هي دي مصر يا هيثم
كتبها وائل عزيز ، في 31 مارس 2008 الساعة: 16:24 م
إلى هيثم أبو خليل…
//
هي دي مصر يا هيثم
هاتوا لي بلد زي مصر…
//
مصر هي الشرف… والنضال والصحافة الحرة..
مصر هي ذكاء عيون أولاد المدارس بالمريلة الميري..
مصر هي سيد درويش وأم كلثوم وأحمد فؤاد نجم..
مصر هي الأزهر ومحمد رفعت وجامع السلطان حسن…
مصر هي الكونسرفتوار والمعهد الديني ومدرسة الراهبات…
مصر هي أذان الفجر صوت وصورة في سيدنا الحسين…
مصر هي القلعة وفم الخليج ومنارة إسكندرية… والسد العالي…
مصر هي الهرم… ومعبد الكرنك… ومترو الأنفاق…
مصر هي القصر العيني … ومعهد الكبد.. ومركز الكلى…
مصر هي هيئة الطاقة النووية… ومركز البحوث …ومجمع اللغة العربية
مصر هي مبرمجين عباقرة ومهندسين مبدعين.. ودكاترة ما جبتهومش ولادة
مصر هي صنايعية جامدين قوي وأسطوات حريفة..ى
مصر هي أطيب فلاحين وأشرف صعايدة و أذكى سواحلية..
مصر هي الصحفيين الشرفاء والمفكرين العظام والمدونيين الأحرار
مصر هي كأس الأمم الإفريقية… وحسن شحاتة و محمد أبو تريكة
//
مصر هي رأفت نخلة بيفطر في رمضان مع عم مصطفى..
مصر هي قرطاس ترمس على الكورنيش
مصر هي فندق العلمين وقصر محمد علي..
مصر هي كيلو سمك مشوي في أبو قير..
مصر هي القناطر الخيرية… وترعة الإسماعيلية… وبحيرة ناصر..
مصر هي ساعي المصلحة بيضحك وهو بيحط الجنيه في جيبه..
مصر هي الشاويش واخذ جنب وبيفطر ساندوتش فول
مصر هي المجند الدفعة اللي بيتشعبط فوق القطر
مصر هي أم بدوي بتطش الطعمية في زيت ما اتغيرش من شهرين
مصر هي عسكري بيرفع العلم فوق سينا… وبيفتح الحدود لأخوه الفلسطيني
مصر هي شلبي بينادي ع البت حميدة تقابله ع القمة…
مصر هي جمالات بترمي ميه ع العيال من البلكونة…
مصر هي كيلو فسيخ مبطرخ … وفحل فصل … وكوباية شاي حبر
مصر هي مركب بمجدافين وسط النيل..
مصر هي الجرسون بيقول الزبون: خليها علي المرة دي…
مصر هي
//
مصر هي ميكروباس زحمة… وهي ليموزين فخم على كوبري ستة أكتوبر..
وعيادة تأمين صحي… بتخدم عشرين مليون..
وطابور عيش طويـــــــــــــــــل….
ودعاء ليلة القدر في جامع عمرو بن العاص…
//
مصر هي مستشفى الشاطبي..
وشط العصافرة…
والمنتزه برضه…
مصر هي الملاية اللف..
وهي السواريه والاسموكن
//
مصر هي الغالي والرخيص..
مصر هي الغني والفقير…
مصر هي المدينة والنجع…
مصر هي النظيف والوسخ…
مصر هي القديم والجديد..
مصر هي الكبير والصغير..
مصر هي الحلو والوحش..
وما فيكيش حاجة وحشة يا مصر..
//
مصر هي مارينا وهي الأنفوشي…
مصر هي 10 رمضان: المعركة والمدينة
مصر هي 6 كتوبر: النصر والمصانع
مصر هي السكة الحديد وهي الطريق الزراعي
مصر هي السيدة زينب وهي مدينة الرحاب
مصر هي لوكاندة الفردوس وهي الفور سيزونز
مصر هي قناة السويس وهي توشكي
مصر هي ساقية الصاوي وهي الأوبرا
مصر هي مدرسة السنية وهي مدرسة الليسيه
مصر هي دار القضاء العالي وساعة الجامعة والقصر العيني
مصر هي الشيخ الشعراوي والغزالي والقرضاوي
//
مصر كلها بتاعتنا… مش بتاعتهم
مش هانسيب أي حته منها لأي حد..
مصر باللي فيها واللي عليها بتاعتنا احنا
… مش بتاعته ولا بتاعتهم
لو بيوتها متربة ها ننفضها…
لو شوارعها مكسرة ها نصلحها..
لو صوتها مبحوح هانديها يانسون…
لو ايديها مكسورة ها نجبسها…
لو عندها برد ها نشربها عسل ولمون..
لو بتزك ها نسندها..
لو ناسها زهقت ها نطبطب عليهم..
لو علماءها طفشت ها نرجعهم…
لو عيالها جعانة ها نشبعهم..
//
مصر مش عيلة…
مصر مش شلة حكم فاسدة
مصر مش ممكن تتحط في جيب حد..
واللي توزه نفسه يعمل حاجة كده ولا كده
ها نجيب بوزه الأرض..
ونحطه تحت رجلينا..
واللي عملها مرة… يعملها ثاني..
//
هي دي مصر يا هيثم…
هي دي مصر يا مصريين.
هي دي مصر يا عالم.
ـــــــــــــــــــــــــــــــــــــــــــــــــــــــــ
التصنيفات : مصر التي في خاطري | السمات:مصر التي في خاطري
أرسل الإدراج | دوّن الإدراج
مارس 31st, 2008 at 31 مارس 2008 4:51 م
انا اعتزر لهيثم وكل من يقراء هذه الكلامات
العجيبة الكأيبة غير المفهومة
انا انصح كل من تسول له نفسة ان قوم بمثل هذا العمل ألا يحاول
وانا اهدد واندد
ولن تنعم امريكا بس خلاص
مارس 31st, 2008 at 31 مارس 2008 8:42 م
الدكتور الحبيب / وائل عزيز …
شرف لي أن تخصني بإدراج …. وطالما الإدراج يخصني ….
فسامحني يا عمي … حأخذ راحتي ….
معاك أولاً في كل إللي قلته في الأول مصر كل ده وزياده … ومين قال لا ….
لكن …. وآه من لكن …
إنت يا دكتور وائل بتقول :
لو بيوتها متربة ها ننفضها…
لو شوارعها مكسرة ها نصلحها..
لو صوتها مبحوح هانديها يانسون…
لو ايديها مكسورة ها نجبسها…
لو عندها برد ها نشربها عسل ولمون..
لو بتزك ها نسندها..
لو ناسها زهقت ها نطبطب عليهم..
لو علماءها طفشت ها نرجعهم…
لو عيالها جعانة ها نشبعهم..
إيدي علي كتفك يا دكتور …. ما هي البلد كئيبة وإيديها مكسره ومتربه وشعبها تعبان جعان … والناس زهقهت وبتغرق في البحر وهي رايحه إيطاليا … فينك يا دكتور … ؟؟
بلاش إنت مين في مصر إللي حينفض ويجبس وكله بيقول يلانفسي …
ومصر للأسف مش كلام محطوطه في جيب عيله واحده ..وبقينا زي دول الخليج … والبيه والهانم والكتكوت بيحكوموا وإحنا بنكح تراب …
يادكتور وائل مصر أنا أشرب مجاريها وأكل طينها … بس مصر مين …
مصر … إللي كرامة أهلها متصانه …. مش مصر عماد الكبير وإللي حصل له …
مصر ….إللي فيها حرية … مش إللي فيها 27 سجن ومعتقل منهم 3 تحت الأرض
مصر … إللي فيها طهارة يد وإخلاص مش فساد ومحسوبية ..
مصر إللي فيها تداول سلطه … مش سلطه وإستبداد وعبودية وقهر …
والله يا دكتور وصفك لبلادنا هزني جدا …. الله يخرب بيت الظالمين والفاسدين طلعونا من هدومنا …. وأنا ما ليش ذنب … والله …. أنا مصري بصرخ ورافع صوتي بالوجيعة علشان الناس تنتبه …. وعمر بلدي حتكون حلوه …والوطن العربي يكون حر …. ومدونة متر الوطن بكام حتكون مفتوحه … يا حقفلها … يا حأغير إسمها وأسميها ….
يا أغلي البلاد يا حبيبتي
أبريل 1st, 2008 at 1 أبريل 2008 7:42 م
ماشى يا دكتور وائل
ايشمكعنى هيثم يعنى
مهندس
مدون فى مكتوب
بلدياتك
مانا كمان عندى التلاتة
أبريل 2nd, 2008 at 2 أبريل 2008 3:59 ص
الأخ العزيز المهندس المدون بلدياتي الحاج عادل…
اخترت أخانا هيثم لأني خايف عليه… مش من حبايبنا الحلوين… أنا عارف إنه بطل وشهم وجريء…
ولكني خايف على اتزانه النفسي… هو ومجوعة من أبطال التدوين في مكتوب مثل الأخت منال سلامة والدكتور سيد مختار والدكتور خالد العلي وهشام بر مصر وعماد (مصري) … و عشرات غيرهم من الأحرار الوطنيين الشرفاء (وليعذرني من نسيته)….
طيب ما كلنا بنحب مصر… إيه الفرق؟!!
اختلافي معهم… أني أشعر أن الميزان عنهم مائل ناحية التشاؤم وفقدان الأمل والإحباط…
لا أحد يزايد على حب مصر…
ولا أحد ينكر سوء ما تمر به مصر الآن…
ولا أحد يختلف على وجوب التغيير في أٌقرب فرصة..
ولكل واحد أدواته في التعبير عن الغضب وعن الرغبة في التغيير…
وكل أشكال الحب مطلوبة…
الدفاع عن الضحايا مطلوب…
فضح الفساد مطلوب..
التنبيه إلى الكوارث والخطايا مطلوب…
مطلوب أن نعرفه… ولكن ليس مطلوباً أن نغرق فيه..
مطلوب أن نقدر حجمه… وليس مطلوباً أن نظنه المصير النهائي…
مطلوب أن نقول نحن نختنق… ثم نرفع رؤؤسنا لنتنفس بعض الهواء النقي…
ما أفعله أنا … وتفعله أنت…
هو إعطاء جرعات من الهواء النقي… لا نخنتق…
لذلك أن قريب منك في التعبير عن الرفض…
أتحدث عن غداّ أكثر مما أتحدث عن اليوم أو أمس…
ولكني لا ألومهم.. ولا أطلب منهم أن يكفوا…
فهناك مدرسة تقول…
ضع رأسه تحت الماء… ولا تسمح له بالتنفس… سيتحمل في بداية الأمر… ولكن حين يستمر الضغط… فلن يقبل… وسينتفض… وسيخرج كل الأدرينالين من جسمه ليمنحه طاقة هائلة للثورة والرفض… بينما لو سمحت له بالتنفس كل فترة (كما تفعل أنت وأفعل أنا) فسنضطر للبدء من جديد، فنحن إذن نفسد عليهم ما يقومون به…
على كل حال… الاختلاف لايفسد لحب مصر قضية..
وكلنا كما تفضلت …
أنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة حرب
باحبها بعنف وبرقة وعلى استحياء
واكرهها وألعن أبوها بعشق زي الداء
….
وسننال بإذن الله ما نطلب ونرجو…
أشكرك لحسن ظنك بي… وتقبل مني خالص الود والتقدير..
أبريل 3rd, 2008 at 3 أبريل 2008 3:16 م
السلام عليكم
اعجبني هذا الوصف وتلك الكلما ويجب ان نتذكر دائما
إنها مصر ..إنها مصر.. أم الدنيا .. وأسطورة التاريخ القديم والحديث .. والمستقبل بأذن الله..
وسلاماتي
أبريل 8th, 2008 at 8 أبريل 2008 7:45 م
اخى د. وائل
مصر اول حضاره واعظم تاريخ
مصر اول كتابه وارقى تعاليم
مصر كلمه التوحيد
مصر البعث والخلود
مصر اول ثوره على الظلم
مصر اول عود اخضر يزرعه انسان
مصر اول مجتمع عرفته الأرض
مصر سله الغذاء فى العالم
ودلوقتى مش لقيه تاكل
مصر ابتسامه من القلب
لكل لجئ لناسها الطيبين
مصر كفاح لتحرير ارضها
من كل الطامعين
كل حاجه حلوه خلقها ربنا
موجود منها عندنا فى مصر
هى دى مصر الغاليه اللى ترابها
اغلى من دمنا وعرقنا
سلام
علا الفولى
سبتمبر 23rd, 2009 at 23 سبتمبر 2009 11:33 ص
[...] [...]
سبتمبر 24th, 2009 at 24 سبتمبر 2009 7:27 ص
[...] [...]
سبتمبر 24th, 2009 at 24 سبتمبر 2009 6:05 م
شوف الفرق بينا وبين اليابان المتقدمه فى هذا البرنامج الرائع خواطر 5 الذى كان يعرض فى رمضان
http://www.youtube.com/results?search_query=%D8%AE%D9%88%D8%A7%D8%B7%D8%B1+5&search_type=&aq=f
سبتمبر 24th, 2009 at 24 سبتمبر 2009 6:10 م
ولتحميل حلاقاته باستخدام الدون لود مانجر
سبتمبر 24th, 2009 at 24 سبتمبر 2009 6:13 م
هاتفيدك جدا
http://noureldens.maktoobblog.com
سبتمبر 25th, 2009 at 25 سبتمبر 2009 6:41 ص
دعوة
====
جمعة مباركة بأمر الله
تحية من القلب
ودعوة لأدراجي
http://zhektmenkom.maktoobblog.com/1614350/أين-الرد-المصري-على-هذا-التهديد-؟؟؟؟/
سبتمبر 25th, 2009 at 25 سبتمبر 2009 3:48 م
الاخ وائل
كلنا نحب مصر …وانت عبرت عما يجيش داخلنا
لكن ميرث مصر وماضيها ..وما ورثناه من هذا الماضى شئ …والبهدلة و المذلة ..والحضيض الذى وصلنا له شئ آخر …منذ متى أخى الكريم لم تعش فى مصر شهورا مكتملة
….
ربنا يفرجها
تحياتى لك